林鄭月娥 – 與你同行:政綱「第二步」記者會<br>(講辭及簡報)

林鄭月娥 – 與你同行:政綱「第二步」記者會
(講辭及簡報)

按此開啟簡報

(須以Adobe Reader 開啟)

各位傳媒朋友,各位香港市民,2月3日我喺分享大會上面,同大家分享咗我施政理念嘅框架,今日非常之高興,同大家能夠再次分享我喺與大家同行編寫政綱的第二步。我必須強調,今日嘅分享並唔係我整個競選政綱的全部,因為我曾經承諾喺今次參選行政長官,喺制作政綱嗰方面,係要同大家同行,聽大家嘅意見。咁但係好似剛才短片,嗯,訪問者嘅心聲,亦都係我過去3、4個禮拜嘅競選工程聽到嘅心聲,咁我就希望喺今次就住我3個施政嘅重點,換句話說,係教育、發展經濟,同埋房屋。用我提出嘅三個新風,即係話管治嘅新風格、政府嘅新角色,同埋理財嘅新哲學,舉出一、兩項我都認喺幾重要嘅措施,希望起到一個集思廣益,同埋拋磚引玉嘅效果。

所以今日嘅介紹,我哋嘅標題係教育新資源,稅務新方向,同埋置業新希望。首先我講講我對於香港嘅願景,我係希望讓所有生活喺香港嘅人都感覺幸福,所以今新年嘅說話係笑口常開,希望香港人開心,亦都係有希望,有信心香港係一個有發展、有公義、重法治,安全、富足、仁愛同埋管治得宜的國際大都會。

但要實現呢個願景,其實唔係好容易,要大家共同努力,我哋需要團結,大家願意一齊去尋求共識,提供一個良好穩定嘅環境,俾各行各業,能夠繼續發揮所長,為我哋嘅下一代創造更大嘅發展空間。

我競選行政長官,就係要盡我最大嘅努力,化解現今社會嘅矛盾、撕裂,同埋以一個務實包容嘅態度同社會各界共同去創造呢個嘅新環境、新氣象,實現我同大家嘅新願景。

好似我剛才講呢,我今次參選嘅政網,係用一步一腳印,同大家一齊同行嘅。我承諾過會係兼聽啦、透過我哋競選口號嘅關懷、聆聽、行動,廣納民意,同大家一齊編個政綱。

我會用管治嘅新風格、政府新角色,同埋理財嘅新哲學,先係三個重點政策範疇,即係剛才講嘅教育、經濟發展,同埋房屋,喺今日提出一、兩個具成效,能夠回應市民訴求嘅具體嘅措施。我喺呢度誠邀市民深化我今日提出嘅措施,而且係以新思維去提出其他大家關心嘅政策建議。

因為一個全面嘅行政長官嘅政綱,無理由淨係針對喺教育、房屋同埋經濟發展嘅。我係會喺3月上旬公布一個全面嘅政綱,希望能夠每一位市民,每一個界別,每一個行業都會喺我嘅政綱裡面睇到我有吸納佢哋嘅意見。

首先係教育,我嘅教育願景係,一個非常非常之野心大嘅,所以係需要共同努力。教育係社會向前發展嘅最重要嘅元素,亦都係為香港締造美好嘅未來嘅關鍵。我視教育開支係投資未來。我嘅目標係要培育我哋嘅年青人,係有擔當,有國家嘅觀念,有香港嘅情懷,有素質嘅新一代。

但我承認香港近年嘅教育政策,無論係理念同執行上,都出現咗啲問題。我承諾,如果我能夠當選,我會全面檢視香港嘅教育制度、教育嘅政策,務求為我哋嘅學生、老師、校長同埋家長,創造一個穩定、關懷、具啟發性,同埋富滿足感嘅教與學環境。

但係喺過去嘅幾個禮拜,我聽到有好多教育界嘅心聲,呢啲心聲都話俾我聽,我哋嘅教育資源呢,係需要重新審視。我喺呢度必須強調,教育係用心嘅事業,錢唔可以解決教育嘅問題,但係等如有一句俗語:無錢不行。咁所以我哋必需要今日處理係一個教育資源嘅問題。

特區政府教育嘅開支係遠低於其他高收入經濟體。由回歸嘅時候只係佔我哋本地生產總值,即係GDP嘅百分之3.42,曾經有一段時間都係攀升嘅,但係近年呢就開始下降,去到2015 / 16,係比回歸嘅時候仲要低係百分之3.3。其中有兩年大家會覺得高咗上去嘅,其實係由於有一次性嘅開支。但係教育係投資,投資係應該係有穩定性,可持續性嘅。呢啲一次性嘅開支唔係唔好,注入一啲基金,或者一啲科研嘅費用,但係佢本身唔應讓係標誌住特區政府對於教育嘅投資。

所以撇除咗呢兩年嘅大幅嘅注資,大家睇到呢個圖表嘅呢條紅線,就係我哋係政府教育嘅開支,真係只係停留喺百分之3到3.5,呢個相對其他高收入經濟體比較低嘅水平。

再睇番自己嘅教育開支係整個政府嘅經常開支嘅比例,係回歸以嚟嘅新低。大家都會記得喺財政預算案,一定係有一個,有一個嘅分析,有一個圓圈喺度嘅,就話呢個餅係點樣切。我記得喺回歸嘅時候呢,我哋話每4蚊政府嘅經常性開支,有一蚊呢就係放喺教育。咁事實上大家睇呢個數字係嘅,係百分之25.3,但係一直落嚟呢,而家真係創咗一個回歸以嚟嘅新低。2016/17,即係本財政年度,政府嘅經常性嘅教育開支呢,佔整體嘅政府開支呢,係百分之21.5。

所以我喺今日就建議,若我當選為下任嘅行政長官,立刻係每一年增加50億元嘅,經常性嘅教育開支嚟到解決即時嘅問題。我重視教育,提出要全面檢視而家嘅教育制度。但係有啲涉及資源嘅問題迫在眉睫,係刻不容緩嘅。所以我我承諾我係需要立刻,真係立刻嘅,在每一年增加50億元嘅經常開支,我強調係經常性嘅開支,因為我嘅政綱呢要係為教育界,或者教與學,提供一個穩定嘅環境,而一次性嘅開支係唔穩定嘅。

咁呀,呢啲50億元嘅教育經常開支,希望能夠做到穩定教師嘅教席、減低學生嘅壓力。可以用呢50億元經常性開支嘅措施包括以下幾樣,都係我聽返來嘅。第一,訂立幼師嘅薪級表,大家知好快香港就會推行免費優質幼稚園教育。但係有一個問題係懸而未決,就係幼師嘅薪級表。

另一個係改善中小學嘅教師編制,第三係將一啲短期合約嘅教席轉為常額嘅教席,第四係增加對融合教育同埋特殊教育嘅支援,第五係改善學校嘅硬件同埋軟件嘅建設,另一個呢就係資助我哋高中畢業生升讀一啲自資院校嘅大學學位課程。

大家會問咁50億元嘅經常性開支等如幾多呢?又可以將頭先嗰啲表係有啲咩變化呢?2016/17嘅財政年度呢,經常性嘅教育開支係747億元,佢仍然係各個範疇之冠,儘管呢個比例係持續咁下降。增加咗50億元嘅經常性開支呢,就等如馬上將教育嘅經常性開支呢,年度增加百分之6.7,呢個比例係相當可觀嘅。亦都可以將呢個年度,即係2016/17嘅財政年度嘅教育經常性開支,佔整體政府經常性開支嘅比例,就由百分之21.5,即係回歸以來新低百分之21.5,就係調升到去百分之22.6。百分之22.6就等如去返番去本屆政府大概2012/13年嗰個水平。

至於點樣去具體運用呢一筆額外資源呢,我喺呢度誠意邀請教育界嘅持份者,包括教師、學生、校長、家長、辦學團體同埋社會各界提供意見。而且提出嘅建議呢係,唔需要限制於呢50億元嘅。呢50億元只係率先放入去個教育制度,如果係有需要,我又當選下一任行政長官,喺財政嘅資源許可之下呢,係應該要繼續投放喺教育嘅。咁係有咗呢啲意見之後,我哋就可以共同嚟到去編排緩急嘅先後,一齊解決教育界面對嘅問題,等我,我哋係可以喺邁向優質教育嘅路上同行。

一個原因點解我咁急於要投放資源呢?就喺呢3、4個禮拜我真係聽到好多教師嘅聲音。喺2月3號我只係講咗短短嘅40個字關於教育,我就收到有幾位老師、校長俾我嘅來信同埋電郵。其中有一位係咁樣講嘅,佢話「老師心不安、心不定,學生又點能夠愉快學習呢?」另一個話:「當聽到林太提出……希望營造穩定嘅環境俾教育界不同持份者,我不禁流淚……我真的好擔憂……我好想追夢,卻很怕遙不可及。」呢啲係我哋充滿教學熱誠嘅教師嘅聲音。呢個聲音係促使我必須要馬上建議投入教育嘅資源。

第二個重點範疇係發展經濟。發展經濟呢有好多好多嘅工作要做。今日同大家分享呢,係如何利用個稅務嘅新方向嚟到發展香港嘅經濟。

我會以理財嘅新哲學嚟發展經濟,善用香港累積咗嘅盈餘,增加香港嘅競爭力。同時呢,係善用盈餘回應市民嘅訴求,改善民生,讓市民能夠分享我哋經濟增長嘅成果。

我相信簡單稅制嘅好處,所以並無意改變香港嘅簡單稅制。喺維持簡單稅制同埋低稅率嘅前提之下呢,我會提出稅務嘅新方向。

若我當選呢,我會即時實施稅務減免措施。有如下呢,我提出兩個嘅具體嘅建議。但係正如我所講,市民俾我嘅意見,唔需要局限喺呢個建議。我歡迎更加多可作一個稅務寬減嘅措施。但係呢啲措施我希望能夠有助於香港發展佢嘅經濟。

第一個措施係實施兩級制嘅利得稅,英文叫做「Two-tiered profits tax」。我早前都同傳媒講過,呢個建議其實多年嚟都係香港商界共同嘅訴求。我今次嘅競選工程裡面,都去過唔同嘅商會會面,亦都係不約而同提出希望香港有一個兩級制嘅利得稅,從而可以減輕中小企嘅稅務負擔。

我建議嘅減稅嘅措施係如下:企業頭嗰兩百萬嘅利潤,個稅率係由而家利得稅嘅百分之16.5,即時減到百分之 10。呢個減稅嘅措施,預計係可以讓數以萬計嘅企業減稅百分之40。當然係講緊比較小型,嗯,中小型嘅企業,佢嘅盈利每一年都係未必達到二百萬,咁所以佢個減稅嘅幅度就係可以令到減少四成嘅稅款。喺首200萬以後嘅利潤,就仍然係沿用返百分之16.5。

換句話說,16.5嘅稅率唔需要增加,但係可以減稅,從而舒緩中小企嘅稅務負擔。中小企稅務負擔得以寬減,佢亦都可以繼續投資喺佢嘅生意,或者改善員工嘅僱用條件。

第二個嘅減稅措施係提供額外嘅稅務扣減,英文叫「Super-deduction」。換句話說,當企業係駛咗一筆錢做某一個用途嘅時候呢,佢可以獲得嘅扣稅,比佢駛咗筆錢嘅金額要高一啲,從而提供一個稅務嘅誘因。

我聽到好多商界嘅意見,呢個似乎大家都無異議嘅,就係為咗鼓勵香港嘅研發,即研究同埋開發(R&D),推動香港嘅創新及科技嘅發展。如果我哋嘅企業喺呢一方面,即係R&D方面嘅支出呢,佢將會獲得呢,係比佢相關金額更加高嘅稅務嘅扣減。我呢度建議俾嘅例子呢,就係例如佢駛100萬喺R&D,係利得率嘅評估方面嘅扣稅額,可以高達200萬,即係雙倍。當然我知道商界其實有啲就話3倍金額嘅寬免。

呢一種額外嘅稅務扣減呢其實都適用於其他嘅經濟範疇,只要大家都認同呢個經濟嘅產業係值得香港嚟到去推動,政府就應該以一個理財嘅新哲學,稅務嘅新方向去做呢個所謂「促成者」嘅角色。咁所以我自己諗得到嘅呢,就喺環保嘅設施,因為隨住氣候變化呢,我都希望能夠喺環保嘅工作做得更加好啦。亦都適合我哋另一個嘅產業,即係創意產業,無論文化藝術,或者設計等方面嘅投資開支,都應該可以享有呢個額外嘅稅務扣減。

但係同樣地,我同大家同行,希望各界,各行各業嘅朋友呢,多提一啲意見,希望藉同一個稅務嘅措施呢,能夠鞏固同埋提升我哋嘅優勢產業,及一啲大力需要推動新興嘅產業。

點解話R&D大家都無異議呢?事實上因為我哋投資喺R&D嘅比例係非常之低。當一個地方要發展成為一個科技或者創新嘅中心無R&D嘅配合將難以成事。呢個圖表話俾我哋聽,其實香港投資喺研發開支係落後於國際嘅其他經濟體。我哋嘅總研發開支,只係佔我哋嘅GDP百分之0.74。相對於南韓超過百分之4,日本都係接近百分之3.5,我哋自己國家都要去到百分之2。而喺我哋毗鄰嘅深圳,已經係超越咗百分之4。

咁所以咁低水平嘅研發開支,實難以實現我哋係創新及科技發展嘅夢想。咁所以呢方面除咗政府會大力投資之外,亦都要鼓勵企業投資喺研發方面嘅工作。

第三個政策範疇係房屋。我嘅房屋願景,當然係希望,當然係個個都能夠安居樂。但係今日選擇講嘅係置業新希望。呢個唔等如我唔關心香港市民,而家有唔少都係居住環境惡劣,例如劏房啦,非法改建嘅工廠作住宅,仲有28萬個家庭呢係度輪候緊公屋。

近年樓價飈升更加令好多年輕中產家庭的置業夢,係變得遙遙無期。為咗改善市民嘅居住環境,同埋滿足置業嘅訴求,我會開拓更加多嘅土地。我個房屋政策將以置業為主導,即係我深信讓市民安居,佢先至樂以香港為家。

近年,私樓嘅樓價同家庭嘅收入係嚴重脫節,可以講追都追唔返。置業對於好多香港人嚟講,已經係可望不可及嘅目標。所以呢個圖表大家睇到,其實短短喺六年之間,私人樓價嘅指數已經升咗一倍。但係我哋家庭收入中位數都只係升咗百分之43.9,咁對於想要置業嘅市民,真係追極都追唔到。

再同大家分享一個例子,其實我哋呢啲例子俯拾即是,我哋身邊都好多年輕嘅朋友都會咁同我哋講。一對年輕夫婦究竟要花幾多嘅時間,先至可以儲夠置業嘅首期呢?我哋假設呢對年輕夫婦嘅情況,其實都相對好。佢哋兩個人都做野,月入係6萬蚊。6萬蚊已經遠遠高過香港家庭收入中位數嘅二萬五千三百蚊。佢哋每個都係好肯慳錢嘅,所以能夠儲到收入嘅百分之三十。佢哋都想買嘅房亦都係一個好基本嘅首置盤,大概係450呎,喺新市鎮嘅單位,今日嚟講,大概係600萬嘅樓價。

但係如果佢要支付嘅置業費,俾首期嘅百分之四十,因為佢嘅按揭成數,只係百分之六十,再加埋3%嘅印花稅同埋1%嘅佣金,係情況一之下全部係靠自己儲錢,都儲百分之44%,咁即係話要儲到264 萬,佢先至有能力上樓。如果呢對夫婦好啲,個父母可以幫佢,或者係有一啲二按,無論係由發展商,或者由我哋嘅按揭公司提供嘅二按,佢可以自己只係儲到20%就可以上車,咁就係144萬。

咁究竟要儲幾耐呢?係情況一之下係12.2年,係情況二之下係6.7年。但喺呢段時間樓價唔係企定咗等你過喎,樓價係會不斷咁去上升,咁所以就出現我剛才講,係好難追得到。

但係要可以解決香港嘅房屋問題,必需要開拓土地。社會係需要有個共識,去努力去搵呢個共識點樣能夠增加開拓香港嘅可用地。如果我當選,我會係邀請社會各界以一個全面、宏觀的態度去檢視土地嘅來源,呢啲土地來源將包括係維港以外填海、舊區嘅重建、新界嘅「棕地」、郊野公園嘅邊陲、私人發展商嘅土地儲備等等。

我會重新建立一個置業「階梯」,為唔同收入的家庭提供置業安居嘅機會,具體嘅措施包括增加「綠置居」嘅供應,俾個啲經濟條件有所改善嘅公屋租戶呢可以購買居屋,就騰空咗佢哋嘅公屋單位俾輪候緊嘅人士。

另一個呢就喺居屋之上,構建中產家庭可以負擔嘅「港人首置上車盤」,重燃呢個置業嘅希望。呢個就係我希望見到嘅置業「階梯」,每個人都能夠可以喺香港置業。

所以,我剛才講咗社會嘅討論必需要集思廣益,我亦都唔希望呢一場咁大型嘅社會討論係由政府一個官員嚟到主導。咁所以我會邀請專業人士,包括規劃、工程、建築、環保,同埋地區人士組成呢個專責小組,去尋求各種可行嘅方案,並羅列各個方案嘅優點及問題,等到社會就開拓土地能夠全面討論,作出抉擇。

我希望喺未來兩三個禮拜,收到大家就上述三個方面嘅具體建議,同埋其他政策範疇嘅建議,協助我編寫全面嘅政綱。

我聽到香港下一代嘅聲音,承諾同大家解決青年人喺學業、事業及置業上嘅困難。各位市民,我生於斯長於斯,以香港為家;我亦都係非常之幸運,受惠於香港嘅騰飛。我對於香港有承擔;我期盼同大家同行,建設一個更加美好嘅香港。多謝大家﹗