林鄭月娥競選分享會

林鄭月娥競選分享會

大家好!今日係農曆初七,係大家嘅生日,我首先恭祝大家Happy Birthday。今日亦都係24個節氣中嘅立春,係春天嘅開始,春天係代表生機無限,我同大家一樣,希望香港每一日都生機無限,大家話係咪呀?

大家今日入到嚟,會睇到我哋今日分享大會嘅主題係同行WE CONNECT,呢個亦都係我今次競選嘅口號。我同我嘅團隊揀咗用同行WE CONNECT,係因為我同大家一樣,知道近年呢個社會出現咗撕裂嘅情況,少咗一份嘅和諧,我哋嘅社會好似有啲停滯不前。我同大家一樣熱愛香港,我哋必須要團結起嚟,同行向前。我首先要多謝喺台上嘅WE CONNECT青年團隊,同我同行。

對我嚟講,WE CONNECT仲有多一重意義,我希望同大家加強聯繫,等大家多啲了解我呢一個人,有信心願意俾我同大家同行。其實過去兩、三個禮拜大家都認識多咗我嘅另外一面,就係好「論盡」嗰一面,而家我落區,我嘅公關團隊第一時間就收起我張八達通咭同埋啲現金!

大家認唔認得呢個少女?呢張黑白照,係我中學時代做總領袖Head Girl同其他領袖生嘅合照,所以都係略嫌嚴肅。

我同好多香港人一樣,都係出身基層家庭,細個時候,我屋企租住咗灣仔告士打道一幢唐樓嘅一個單位,無自來水、無電梯、無熱水爐,我哋係燒火水嘅,當時能夠沖一個熱水涼,都已經要花好多功夫。

我記得我中學畢業嗰一年,我父母儲夠咗首期,喺鰂魚涌嘅南豐新邨買咗一個,當時係計算建築面積,唔係實用面積,建築面積600多呎單位嘅樓花,成家人因為首次置業嘅興奮,我今日都記得。雖然當時嘅物質生活唔係好豐富,但係我哋對前景充滿希望,我哋知道只要我哋努力,日子喺會愈嚟愈好嘅。

我細個喺灣仔長大,讀書嘅地方都係喺灣仔。由細至大一共十三年,我都係喺一間學校受教育,就係位於堅尼地道嘅嘉諾撒聖方濟各書院,呢間學校對我嘅薰陶,令我終身受用。呢間嘉諾撒聖方濟各書院建立於1869年,係一間天主教嘅女子學校,我哋學校外牆最出名嘅就係呢四個天使,佢哋象徵忠、信、仁、愛,我哋學校嘅校訓係「力行仁愛,實踐真理」。今日我好高興在座有我幾位fellow Franciscans,我嘅舊校友,其實我嘅舊校友好多都係從事教育工作,因為我哋天主教修女係要求我哋服務社群,而最好服務社群嘅方法,就係通過教育,今日一個畢生從事教育工作嘅師姐鄭芷馨都喺度,阿Jane,歡迎你!

( 鄭芷馨:你係Franciscan嘅光榮,我哋亦都好開心,咁多個喺度同你撐,好開心呀,真係好開心呀,其實我都聽到好多關於你啲傳言,譬如有好多人覺得你嚴肅,我就想喺呢度澄清,其實我哋唔係嚴肅嘅,我哋其實係好認真工作就真,因為我哋嘅學校,教識我哋一樣嘢,人哋俾你一樣嘢做,一定要做得到、做得好,唔係做咗就算,呢句話,我係畢生受用嘅,一定要做得好,唔好就咁話做咗就算啦,所以Carrie,你呢個態度可能就係俾到有啲人就覺得你好嚴肅,其實要澄清,你都係認真工作。咁呢,仲有一樣嘢呢,我覺得我哋係St Francis長大,正如你講,我哋係好熱心參與社會嘅,我記得我哋係中學已經成日比Sister叫我地去老人院啦、去醫院啦、去孤兒院嗰度做服務嘅,仲有我哋學校好特別,好早已經有融合教育,即係唔好講我哋而家嘅融合教育係90年代嘅,我哋嗰陣時係融合教育,因為我哋有好多係失明或者係弱視嘅同學,同埋我哋仲有一個附屬嘅失明盲女院,咁我記得嗰陣時,我哋要成日落去盲女院嗰度去做Service,教佢哋brail 啦,即係凸字,知點樣認返啲字啦,或者同佢地默書。我覺得我哋學校真係俾到我哋好多包容,好體諒弱勢社群,同埋好熱心社會嘅工作。所以,Carrie我都有留意你㗎,因為你係咁出色嘅師妹,唔係淨係話最近我哋籌款啦,你咁熱心幫學校,同埋佢地話你嚴肅呢,我想講吓,其實我哋每個禮拜日呢有陣時都會去聖堂嘅,我哋去完聖堂,就走落去灣仔嗰度,去一間叫做名苑,唔知你哋喺灣仔記唔記得,一間唔係好起眼嘅茶餐室嗰度食個好廉價嘅早餐,30蚊樓下,但係我哋喺嗰度就商量好多嘢㗎喇,點樣籌款、點樣幫學校呀,所以正如我講,一路睇住Carrie呢,見到佢真係係可以秉承我哋Franciscan嘅宗旨,就係熱心社會嘅服務,關心弱勢社團,所以Carrie,撐你!)

多謝阿Jane。

入咗呢間學校,係我人生第一個轉捩點,呢間學校比咗我好多良師益友,亦都好似頭先阿Jane講,好多令我哋終身受用嘅格言。我記得我中七嘅時候係總領袖生 (Head Girl) ,我嘅訓導主任同我講,「你做Head Girl, you should care and inspire」,意思係話,對於同學同低年班嘅師妹,應該係用一種關懷、感染,同埋以身作則嘅態度。

係今日香港嘅社會,我哋有好多爭拗、有好多矛盾、有好多唔能夠共存嘅時候,我覺得呢句嘅金石良言,都應該發揮到一個正面積極嘅作用,大家話係唔係呢?

我人生第二個轉捩點當然係1977年考入香港大學社會科學學院,主修社會學,除咗讀書之外,其實個陣時我都好多時走堂嘅,我參加咗好多認識中國,關心社會嘅活動,知道社會存在唔少嘅不公義,好多社運前輩我都係喺個陣認識,幾十年嚟都係好朋友,包括我非常非常尊敬嘅杜葉錫恩女士同埋劉千石先生,今日石哥都喺度。多謝石哥。

(劉千石:多謝你,我識你嗰陣呢,我淨係知你叫做鄭月娥,因為嗰時你喺港大讀書,我係基督教工業委員會嘅同事,我做啲勞工服務嘅工作,我同時亦都係大學嘅社會服務團嘅副團長,咁我有機會去大學演講,我認識鄭月娥已經40年了。好多人你知道聽完之後就係過眼雲煙,散咗,但佢好好,完咗之後佢就會聯絡我,問我,喂,佢叫我石哥㗎,喂石哥,有啲乜嘢係最急切要關心㗎呢?咁喺70年代嘅時候呢,我處理過不少嘅勞資糾紛,但最棘手嘅係老闆走佬,冇人工。大家知道,人工至緊要,打工為乜啫?為兩餐,出糧,冇糧出就好弊。咁我同佢講,我話呢樣係我最關心嘅。佢呢,就幫手去搵究竟喺其他地方,點樣處理呢啲欠薪走佬嘅時候,用咩方法嚟到解決呢?咁對以後呢,能夠有呢個欠薪保障基金,係有一個幾大嘅幫助,多謝你呀,Carrie。)

由於我參加咗好多認識中國嘅活動,所以就有機會踏足當時由文革創傷走出來嘅中國,無論係參加香港大學同埋清華大學嘅學生交流團,或者我私人嘅遊歷,我都深深咁感悟到經濟發展對於一個社會嘅重要性,對於改善民生嘅重要性,而改革開放係經濟發展嘅動力,香港亦都唔例外,今日開始有啲人擔心,我哋嘅經濟發展嘅動力係咪被磨損咗呢?我哋向前行嘅動力係咪受到一啲窒礙呢?所以我曾經講過一句說話,話我不甘心,因為我相信香港嘅動力係仍然存在嘅,係咪?

我人生另外嘅一個轉捩點當然係大學畢業搵嘅第一份工,係進入政府做政務官,開始咗我36年多無間斷過嘅公僕生涯,呢個亦都係令我感到非常之驕傲,因為俾咗我好多好多嘅機會能夠服務市民、關顧基層。我一共做咗20個工作崗位,如果你今日問我有邊幾個工作崗位令我印象最深、對於我嘅人生價值觀影響最大,我第一個會係講80年代初期,喺西貢擔任西貢民政事務專員,嗰時嘅民風好純樸,嗰陣時西貢亦都係一個比較鄉郊地方,未有將軍澳新市鎮。由於我係喺西貢工作期間結婚,所以西貢嘅地區人士呢,就算去到今日見到我,都話我係西貢嘅外嫁女。

呢張唔係結婚相,呢位男士亦都唔係我老公,大家認唔認得呢位咁英俊、著住白色禮服嘅男士呢?今日佢都係現場喎,佢就係現在西貢區議會主席吳仕福,福哥!

(吳仕福:我同Carrie認識呢,係喺1983年,當年我同佢呢,係好後生㗎,而家都係。我地喺地區一齊工作,我覺得Carrie係非常之聰明,好快就能夠掌握得到我地西貢區嘅問題,亦都好貼地,同我哋地區打成一片,一齊去解決呢個問題。Carrie,我好希望你,今次選舉能夠成功做我地下任特首,繼續推動官商民合作,帶領我哋香港百業興旺,政通人和。)

第二個對我日後施政有啟發性嘅崗位,係喺財務科(即現時庫務科嘅前身)嘅7年,這段管理政府開支嘅日子令我明白到,在維持「小規模」政府嘅自由經濟同時,政府必須善用資源,投資未來,關顧弱小。期間我有3年係代表政府出席立法會財務委員會,接受立法會議員監察,而當時嘅財委會主席,今日都喺現場,就係夏佳理,Ron。

(夏佳理:Carrie我都同你合作咗好耐,但對我嚟講呢,喺財委會嗰陣時,見到耐唔耐呢,即係政府申請撥款,你會收回,我咁多年都唔敢問你,但今日我要問,忍唔到喇。事實上你收回之後返去政府,啲同事點同你講呢?)

梗係向我老闆投訴啦!我每次知道立法會對嗰份財委會嘅文件,仲有啲未能解答嘅疑問,我都比較主動,就話「咁我撤回個文件先啦,下一次我地有充足嘅資料再嚟過。」我唔知呢啲係咪都叫做「官方嘅剪布」,但返到寫字樓就慘喇,嗰個文件嘅政策局呢,一定向我老闆投訴,佢梗係會話,喂,我地個局係數夠票㗎喇,做乜Carrie要收番個文件。所以,都好悽涼。

(夏佳理:我唔好意思,引咗你講呢啲說話,因為我希望你今次選特首,會贏㗎。但係呢,你嘅未來班子聽到呢個,以後如果佢地有人收番,唔該你唔好鬧佢。)

跟住令我個人體會好深嘅工作,當然係社會福利署署長,尤其是我當社署嗰3年,係香港經濟就業環境非常惡劣嘅3年,香港嘅失業率係高達8.6%,亦都出現咗財赤,再加上有沙士。喺呢段日子裡面,我都公開講過好多次,係我公務生涯裡面,有最大嘅滿足感,因為我每日就能夠好直接咁幫到有需要嘅市民,為咗唔好放過每一個幫到市民嘅機會,我由嗰陣時就養成咗一種習慣,就係會堅持親自睇,同埋跟進每一封寫比我嘅信,無論佢係寫比林太、林鄭月娥、署長,或者就咁寫比主管,嗰封信都會係我親自睇嘅。過去十幾年,我做咗唔同嘅工作崗位,但呢個習慣並冇改變,不過由於公務繁忙呢,我由以前可以每日睇信,而家大概每個週末冇咩會議嘅時候,我就會返到寫字樓,去睇市民寄嚟嘅信,或者而家嘅電郵。今日在坐有一位年輕人,我係今日第一次見佢,但我同佢由2015年底,就透過我呢啲睇信嘅過程裡面,睇到佢寫比我嘅一封信,由嗰陣時開始,我地都多次喺電郵溝通,大家去傾下香港嘅醫療服務,因為佢係一位好年輕嘅藥劑師畢業生,Eason Chan。

(Eason:大家好,我係Eason。其實我都唔知我要講啲乜嘢㗎,不過嚟到當然係支持林太啦,咁講下點解我會喺度出席呢個林太嘅分享大會。其實喺我2015年畢業嘅時候,點解我會認識林太呢,當年林太係我地畢業禮嘅主禮嘉賓,咁當年佢都share咗好多佢對我地香港醫療制度嘅睇法。佢亦都好appreciate我地香港嘅醫療系統係好好嘅。但我地藥劑畢業生當時其實係徬徨,因為由14-15年打後,藥劑畢業生好難喺香港搵到工作,我地啲同學都唔知畢業之後可以做啲咩。咁當時我地都好似求救無門咁樣,我就膽粗粗試下不如send個email去政務司司長辦公室睇下有冇反應啦,因為當時林太出席我地畢業禮㗎嘛。咁點知send完一段時間,我自己就冇再理呢件事喇,過咗一段時間收到reply喎,好驚奇個署名係林太自己親身署名我呢封email嘅,佢亦都好同情我地藥劑畢業生,同埋講到我地畢業生其實唔駛咁徬徨,但佢都好同情我地嘅狀況,亦都好知道其實佢地政府亦都有refill緊呢啲 manpower嘅refill啦,我當時覺得,嘩,呢個司長作為一個高官,會回我呢個小市民嘅信?仲要係一個啱啱畢業嘅學生。所以當時機緣巧合之下就認識咗林太,同佢有email嘅來往,所以我覺得佢係一位好用心,表面上佢唔係好同人溝通,但其實佢同好多人溝通咗你唔知嘅一位官員。所以我就覺得我應該出嚟支持佢。)

多謝,多謝。Eason,我喺離職嘅前兩日仲追緊功課,嗰個政策局仲未交功課比我,就係有關香港醫療人手未來規劃。當然最後一個工作崗位係令我好難忘嘅,4年半嘅政務司司長嘅工作,我除咗要統籌各個政策局同埋大家都比較熟悉嘅扶貧安老助弱工作之外,其實有一份工作,或者有一個任務,大家比較少知嘅,就係我係時常不斷外訪,去推廣香港呢個國際城市。近年有人話見到我時常著長衫,其實呢個都係因為外訪嘅需要。因為我覺得長衫係最能夠表現出東方女性嘅體態,雖然我身材唔算好,哈哈。但我覺得,如果我去見一啲外國政要,咁樣穿著呢,都會覺得佢地對我特別客氣嘅,所以呢個就係點解近年我著多咗長衫嘅原因。即使唔係喺外訪嘅期間,我喺香港工作,都同商界保持接觸。其中我係一個國際商務委員會嘅主席,有20幾個國際商會,都係呢個委員會嘅成員。好多謝佢地今日都抽空嚟咗,thank you very much Nicholas, Fabio, Rebecca, thank you.

好喇,講咗好多過去,係時候講下現在同埋未來。大家都知道,我作出一個決定,參選行政長官係比較突然,準備嘅時間亦都好倉卒,事實上呢個係非常之艱難嘅決定,亦都係我人生裡面嘅最大挑戰,但係好彩,我有我屋企3個男人嘅支持,特別係我個大仔,林節思Jeremy,我同節思當然係母子啦,但我哋亦都係朋友,過去幾年,我時常同節思一齊去旅行,掉低佢老豆同埋個細佬,我哋去敦煌,我哋去內地嘅山區參加「無止橋」嘅義工。節思去挪威參加馬拉松比賽,我飛到去嗰度同佢打氣,我地兩個係非常之親密㗎。節思好錫我,佢知道我過去幾年都好辛苦,所以佢聽到我打算參選行政長官,佢即時嘅反應係3個字,係「我反對」,跟住就唔再聽電話。由反對,到接受,到支持,因為節思知道佢媽媽對香港社會有承擔,對香港嘅年青人係好關懷嘅,今日節思都趁住新春假期,喺北京嚟到現場,同我打氣,Jeremy,多謝你!

( Jeremy:媽媽,喺我細個嘅時候,我會好害怕,但係你總係會安慰我,等我相信呢個世界冇嘢係值得恐懼嘅,然後當我成長嘅時候,我有時候會好迷失,你就會指引我,令我相信呢個世界冇困難係唔可以克服嘅。到今日,我已經大個仔,已經懂事,但我仍然懷著童年時候嘅信念,去相信你,支持你,同埋陪伴你一齊走未來嘅路,多謝大家。)

Thank you。跟住講未來,喺我同大家分享我嘅初步政綱之前,等我地一齊聽下市民對於我,同埋下一屆政府嘅期望。

我頭先可能見到英俊嘅福哥,我興奮過度,我喺西貢1983到1985年呢,我係做西貢政務署嘅助理民政事務專員,雖然有四個月呢我其實都係做埋署理專員呢個職位嘅。我好多謝剛才喺短片裡面嘅市民對我嘅支持同埋信任,我知道香港仲有好多問題係要解決嘅,我聽到好多年輕人話俾我聽,佢哋對於自己嘅學業、事業,同埋置業都感到好困難,佢哋亦都好想能夠參與建設香港呢個社會,我會用我最大嘅誠意同埋努力,團結社會,做好未來嘅工作。我喺初步歸納咗社會嘅聲音,我感到市民大眾都希望下屆政府能夠持續推行佢哋歡迎嘅政策,例如扶貧、安老、助弱、環保,同埋強化地方行政。但係好明顯,有以下幾個範疇,市民應該係認為下一屆政府要作為施政嘅重點嘅。

第一,係加大力度開拓土地,滿足社會同埋經濟發展嘅需要,並且要加快興建房屋,解決置業難,同埋居住環境差呢個問題;第二個施政重點,係多元發展經濟,創造優質嘅就業,我哋既要鞏固同埋提升好似金融、航運及物流、專業服務,同埋旅遊呢啲傳統優勢產業,亦都要加快去推行一啲新興產業,包括創新及科技,同埋創意產業;第三個施政重點,係教育,因為我剛才都提到,教育係對於香港未來最重要嘅投資,我同我嘅團隊會全面檢視香港嘅教育制度,為學生、家長、教師,同埋校長,創造一個穩定、關懷、具啟發性嘅教同埋學嘅環境。

要做好呢啲工作,如果我有幸能夠成為下一任嘅行政長官,我會帶領政治問責官員同埋公務員嘅團隊,喺以下三方面注入新風,第一係管治新風格,我哋重視公眾參與,與民共勉,而且係需要廣納賢能,用人唯才。第二係政府新角色,除咗要繼續做好一個公共服務提供者,同埋一個監管者嘅角色,政府係應該更加努力去做一個促進者同埋一個推動者嘅角色,為百業拆牆鬆綁,利便營商。第三係理財新哲學,政府必須要善用資源,投資未來,回應市民嘅訴求,讓大家能夠分享經濟增長嘅成果。

我剛才講嘅只係我嘅施政框架,喺未來幾個禮拜,我會好小心聆聽社會大眾嘅意見,亦都會諮詢我啲顧問,制定同埋公布全面嘅政綱。各位在座嘅朋友,各位香港市民,我知道前面嘅路一啲都唔容易行,但係我對香港有承擔,我對市民有信心,我願意以關懷、聆聽、行動,同大家一起攜手同行,我相信我哋一定能夠令香港明天更美好。

多謝大家!

2017年2月3日