林鄭月娥公布參選政綱 (講辭及簡報)

林鄭月娥公布參選政綱 (講辭及簡報)

按此開啟簡報

(須以Adobe Reader 開啟)

各位傳媒朋友,各位香港市民:

今日非常之高興同大家公布我參選2017年行政長官嘅全面政綱。

我自從1月16日宣布咗參選以嚟,已經同所有38個選委界別–無分建制或者泛民–見面,聆聽佢哋嘅意見,進行咗接近100場大小規模嘅「心談會」,我形容呢啲會面係心談,因為大家都係非常之坦誠同我交流意見,無論呢啲意見係贊成我嘅施政理念或者批評我本人,我都係非常之虛心咁聆聽。

我亦都同我嘅130位主席團嘅成員、資深顧問同埋政策顧問舉行咗十二次嘅座談會,聽取佢哋嘅意見,我先後喺2月3日同埋2月13日公布咗我嘅施政理念同埋引入新風,包括管治嘅新風格、政府新角色同埋理財嘅新哲學,亦都率先喺教育、經濟同埋土地房屋方面提出咗一啲具體嘅措施,集思廣益,引發討論。我深受感動,亦都喺呢啲過程獲益良多,所以可以講我今日公布嘅全面政綱係同大家一齊編寫嘅。

喺呢6個禮拜裡面,我聽到充滿教學熱誠嘅年輕老師畢咗業8年,但係都係以短期合約嚟到去聘用,佢哋擔心今個暑假之後仲可唔可以留喺校園;我聽到喺公營醫院裡面工作嘅年輕醫生除咗工作量好重、時數好長之外,佢哋擔心專業培訓嘅機會唔夠,令到日後專科醫科嘅人手會青黃不接,降低咗香港嘅醫療水平;我聽到喺本港大學畢業嘅中醫師,都係好年輕嘅,因為中醫藥喺香港嘅公營醫療系統冇一個明確定位,佢哋對自己嘅事業前景感到好迷茫;我又聽到都係好年輕嘅臨床心理學家,因為呢個專業目前喺香港仍然未有法定註冊,擔心行業嘅質素會參差,影響市民嘅健康。

我落到區,聽到好多居民話鐵路有新嘅線開真係好喇,好方便,但係長途車費負擔好重,繁忙時候搭地鐵,個月台擠迫,要等幾輪先可以上到車;年輕嘅專業夫婦話畀我聽面對不斷飆升嘅樓價,擔憂置業無望;好多喺屋企附近冇一個公共街市嘅市民,佢哋話買日用品同埋新鮮食材選擇有限,亦都加重咗佢哋嘅生活壓力,呢啲聲音,我全部聽到,今日我公布嘅政綱係以行動,廣泛深入咁回應社會嘅訴求同埋需要。

早前我嘅政綱初稿已經喺兩部分作咗一啲宣布,我今日會重點介紹政綱全稿裡面四方面嘅施政,但係我鼓勵大家一整份政綱去睇一睇,因為裏面有好多大家嘅心聲。呢四個方面分別係民生、公務員、經濟同埋青年。

喺民生方面,我主張要關顧民生,紓解民困,如果我當選,我會用政府喺港鐵得到嘅股息去降低長途車費嘅負擔。大家都知道喇,香港特區政府係港鐵公司嘅大股東,佔嘅股份約百分之75,每年獲派嘅利息超過40億元,我會用部分股息嚟到去降低我哋啲打工仔女日常嘅長途車費,預計數以10萬計嘅市民係可以受惠。我亦都建議增設全線列車免費Wi-Fi,因為方便、快速嘅Wi-Fi網絡係香港成為智慧城市唔可以缺少嘅元素,今日港鐵已經喺機場快線嘅列車提供免費嘅Wi-Fi,我會邀請港鐵公司研究擴充免費Wi-Fi去到全線列車嘅可行性,方便市民。

醫療係我哋市民最關心嘅民生事項,我會根據各區人口結構變化嘅需要,盡快落實已經預留咗2000億元撥款嘅10年公共醫院發展計劃,並會研究擴充而家正喺度興建嘅中文大學醫院嘅規模,因為我留意到喺今日興建嘅中大醫院嘅側邊其實仲有一塊土地。制定長遠醫護專業人手政策其實係急不容緩,我哋亦都需要投放資源去確保全數本地醫科畢業生可以受聘於公營醫療系統,並且係獲得培訓嘅機會。穩定專科醫生嘅供應至為重要,我們亦都係應該發揮各個醫療專業所長,換句話說,唔單止係醫生、護士,以至到其他輔助醫療嘅人手都應該有佢嘅專業角色,我哋亦都要為公營醫療機構挽留人材。剛才我提過,目前仍然有一啲專職醫療人員喺香港未有法定嘅註冊制度,例如臨床心理學家、言語治療師、營養師等,我建議為佢哋引入法定嘅註冊制度,確保專業水平同埋保障市民嘅權益,亦都會研究優化喺醫生同埋呢啲輔助醫療人員之間嘅轉介程序。中醫嘅定位係非常之重要,特區政府係需要確立中醫藥喺公營醫療系統嘅定位,因為有咗呢個醫療嘅定位,我哋先能夠按住呢個醫療嘅定位去規劃首間喺將軍澳將會興建嘅中醫院嘅運作模式,同埋改善目前喺18區嘅中醫診所嘅三方合作模式,以及我哋中醫師將來嘅專業發展。

提供硬件、軟件去支援康健樂頤年active Ageing,亦都係我哋面對人口老齡化嘅一項重要嘅工作,我建議喺各區增建一啲可提供多項長者服務嘅社區中心(Community Centre),提供各種畀長者保持身心健康活動嘅空間。
民生無小事,所以日常買到食材同埋日用品都係非常之重要,政府係會投入資源改善而家係屬於食物及環境衛生署管理嘅街市去吸引人流,為基層嘅市民提供更加多日常購物選擇同埋便利,至於喺一啲暫時冇公共市政街市嘅地區,政府應該係重新建設呢啲市政街市,我哋亦都會促進地區經濟嘅發展,包括研究喺各區增設特色嘅墟市。
房屋係我哋而家面對最重要嘅問題,當我哋努力咁去開拓土地、增建房間,不但止係公屋、綠置居、居屋,或者係我早前提出嘅港人首置上車盤,但有一個地方係可以好快做嘅,就係針對目前未補地價大概25萬個居屋嘅單位,我願意去研究推出一啲試驗計劃,容許呢啲單位喺未補地價嘅情況之下,佢哋嘅業主係可以通過同一啲社會企業合作,將個單位喺市場放租,從而增加租住單位嘅供應,亦都可以更快咁解決而家居住困難嘅家庭。

第二部分係公務員,香港有一支非常之優秀嘅公務員隊伍,但係呢一支優秀嘅公務員隊伍亦都面對好多嘅壓力同埋問題,所以喺我今日提出嘅政綱,我建議簡政放權,提升公務員嘅士氣。

第一方面係檢視各個行政嘅程序,喺唔影響公眾利益嘅情況之下,簡政放權,包括優化政府各個基金嘅審批程序。實質上喺過去幾個禮拜,我去到好多嘅界別,佢哋都話畀我聽,往時政府都好支援我哋嘅,曾經一次過撥款,成立咗各式各樣嘅基金。但係呢一啲基金好難申請,有啲話得物無所用。譬如舉個例子,我哋喺1999年成立咗優質教育基金,當時撥款注資係50億元,但係今日優質教育基金嘅結餘係高達80億元。換句話說,過去一段好長嘅日子真係好難批出呢啲優質基金嘅撥款畀教育界同工能夠提升香港嘅教育質素。

第二方面我亦都檢視各個部門為市民提供嘅公共服務,喺過去兩年,有冇受到呢個「0-1-1」開支削減嘅方案所影響,如果發現公共服務受損,我哋需要採取相應嘅措施。我亦都會檢視目前公務員體系所謂嘅限時職位,time limited posts呢啲職位嘅開設,係製造咗公務員一啲填補同埋晉升嘅問題,我必須喺呢度處理呢個問題,讓我嘅公務員同事能夠安心工作。

第四方面係重新研究畀2000年後入職嘅非長俸公務員選擇延長服務年齡去到65歲。大家可以想像,喺2000年之後入職嘅同事,其實都只係有公積金,唔係有長俸,佢哋亦都其實好年輕,都係三十幾歲,所以既然人口政策希望能夠延長服務嘅時間,亦都應該由公務員做起。當然,紀律職系嘅人員即使係延長服務時間,亦都係由今日嘅55歲延展到60歲。

最後係改組中央政策租,成為一個提升公眾參與、統籌、跨局、跨部門政策制定,同埋去共同審視項目嘅單位,倡議政策嘅研究同埋創新,改組之後嘅新單位,將不再參與法定機構同埋政府委員會嘅人士任命。

第三方面係經濟,大家都記得我早前公佈下屆政府有三大重要嘅範疇,包括經濟發展,因為有好嘅經濟發展,我哋先至有能力改善民生,喺呢方面我倡議政府有一個更加主動積極嘅角色嚟到去推動經濟發展。有幾個方面嘅工作,第一係稅務,我提出稅務嘅新方向,除咗維持香港有一個簡單嘅稅制同埋低稅率之外,應該為香港建設一個更加具競爭力嘅稅務嘅制度,去促進相關嘅行業、企業、社會同埋經濟活動嘅發展。我先前已經提出咗兩項嘅減稅措施,喺呢度我唔再重覆。為咗集思廣益,與民共議,更加多稅務新方向嘅措施,行政長官將會召開「稅務新方向高峰會」,希望能夠為香港制定更具前瞻性嘅稅務政策,提升我哋嘅競爭力。

另一個政府喺經濟發展嘅角色就係創造空間,我哋會大力開拓工商用地,等到企業有足夠嘅空間去營運同埋拓展業務。我會同成功活化咗工廈嘅業主商討,以優惠嘅租金出租佢哋部分活化工廈嘅樓層,作為共用工作空間(co-working space),特別係適合年輕人創業所用。亦都會研究喺顧及消防安全嘅前提之下,進一步嚟到去適當放寬喺工廈嘅較低樓層嘅相關限制,畀到工廈能夠較容易作一啲非工業用途。另外,係掌握相關基建喺未來相繼落成之後,將大嶼山發展成為連繫珠三角嘅區域,推動發展。

第三個政府嘅角色係對外嘅,喺基本法之下,香港係可以自行發展我哋對外事務(external affairs),喺呢方面政府應該更加主動積極,強化特別係「政府對政府」嘅對外事務連繫。首先,係會爭取同內地簽署「一帶一路」全面合作協議,打造香港成為有關「一帶一路」項目嘅金融服務中樞。另外,行政長官同埋相關嘅主要官員,亦都應該定期去組織商貿代表團,到訪唔同嘅經濟體,包括「一帶一路」嘅沿線國家,去強化我剛才講嘅「政府對政府」(government to government)嘅對外事務聯繫。第三係設立更加多嘅海內外經貿辦事處,並為呢啲辦事處制定具體嘅工作目標,積極為本地企業尋求商機。最後,亦都係一個「政府對政府」嘅行為,更加積極去同其他經濟體簽訂各樣合作協議,包括自由貿易協定(free trade agreement),促進同埋保護投資協定(investment promotion and protection agreement),同埋全面性嘅避免雙重徵稅協定(comprehensive agreement on the avoidance of double taxation),以及就個別行業簽訂一啲雙邊或者多邊嘅貿易協議。

最後嘅角色係培育人才,呢個係責無旁貸,我哋會投放更加多嘅資源,同埋通過適當嘅政策,為唔同嘅行業培育人才。具體我將會要求政務司司長主持一個人力資源規劃委員會,為唔同行業去培訓,同埋去規劃未來嗰個人才嘅。我哋亦都會致力發展香港成為區內金融服務嘅培訓樞紐,積極為職專教育提供更加好嘅硬件配套同埋政策,以及研究增加「持續進修基金」嘅資源同埋所資助嘅課程。

最後係青年,喺我嘅全面政綱裡面,青年係擺喺結語之後最後一個章節,因為我想帶出一個訊息,就係喺呢個政綱嘅前部分,所有嘅政策其實都係為咗我哋嘅下一代嚟到去做嘅。我嘅青年部分係希望能夠邀請青年人與我同行,因為青年人係社會上最有活力,最有創造力,同埋最能夠推動社會發展嘅新生代。我哋要致力解決青年喺學業、事業同埋置業方面嘅困難,增加青年議政、論政同埋參政嘅機會。喺呢個所謂「三業」同埋「三政」嘅工作裡面,我提出咗一啲具體嘅措施。喺學業方面,我哋會增加教育經常性開支,資助高中畢業生升讀自資院校嘅大學學位課程,並且探討靈活償還大專學生嘅學費貸款,減輕大學生同埋一啲啱啱畢業嘅同學財政負擔。喺事業方面,會大力拓展經濟,為青年人創造優質就業嘅機會。特別喺創新同埋科技以及創意產業方面,而且會為一啲初創嘅青年人提供更加多嘅共用工作空間,同埋學習嘅機會。

喺置業方面,我已經提出咗重建置業階梯,大力開拓土地,提供「港人首置上車盤」,重燃青年人嘅置業希望。喺議政方面,行政長官日後將主持年度嘅青年發展委員會高峰會,並且同主要嘅官員定期訪問學校,以及用各種嘅溝通途徑,包括社交媒體同青年對話,增加交流機會,亦都確保青年人嘅心聲能夠直接去得到行政長官嘅耳裡面。

喺論政方面,政府有好多嘅法定組織同埋諮詢委員會,我建議會起用一定比例嘅青年成為委員,並且選定一啲諮詢委員會,試行我喺管治方面提出嘅「自薦」計劃,讓青年多啲機會參與公共嘅事務。

最後,喺參政方面,經過改組中央政策組成為嘅政策及項目統籌組,我將會招聘20到30名有志政策同埋項目研究嘅全職青年,以合約嘅形式加入政府,促進青年對於公共政策制定嘅了解同埋參與。上述嘅工作將會由政務司司長主持嘅青年發展委員會統籌各個政策局同埋部門,全力推進。

各位傳媒朋友,各位香港市民,我嘅願景係希望我哋嘅小朋友喺具啟發性同埋創意嘅環境愉快成長,畀青年人有機會各展所長,創造美好嘅人生,畀中壯年嘅人士有一個穩定而富滿足感嘅環境,為家庭同埋事業打拼,畀到我哋嘅長者能夠安享佢哋嘅黃金歲月。

各位朋友,我喺聽朝早上就會提交我嘅提名表格,正式爭取成為行政長官選舉嘅候選人。我喺呢度重申,我嘅參選只係有一個目的,就係為咗同大家同行,讓香港更加美好,多謝大家。